Turmush — Бүгүн, 24-апрелде Каракол шаарында Чернобыль атомдук электр станциясындагы каргашалуу окуянын 40 жылдыгына карата эскерүү иш-чарасы өткөрүлдү, деп билидирет аймактык кабарчы.
Маалыматка караганда, бүгүнкү күндө Каракол шаарында бул апааттын 13 катышуучусу жашап, коомдук турмушка жигердүү аралашып келишет. Алардын ар бири — эрдиктин, чыдамкайлыктын жана мекенчилдиктин үлгүсү.
Каракол шаарынын мэри Талантбек Имановдун тапшырмасына ылайык, Чернобыль апаатынын 40 жылдыгына арналган иш-чаранын алкагында катышуучуларга жана каза болгон жарандардын элесине арналган эскерүү аземи уюштурулду.
Иш-чарага Каракол шаарынын вице-мэри Эрмекан Дүйшөбаева катышып, апааттын катышуучуларына терең ыраазычылык билдирип, алардын эрдиги ар дайым жогору бааланарын белгиледи.
Аземде апааттын курмандыктары бир мүнөттүк эскерүү менен эскерилип, каза болгондорго багышталып Куран окулду.
Чернобыль апаатына жалпы Ысык-Көл облусунан 622 жаран катышкан. Бүгүнкү күндө алардын 87си гана арабызда. Бул көрсөткүч жыл өткөн сайын алардын саны азайып бара жатканын эске салып, алардын эмгегин баалоо жана урматтоо зарылдыгын дагы бир ирет айгинелейт.
Иш-чаранын жүрүшүндө катышуучуларга Каракол шаардык мэриясынын, Каракол шаардык кеңешинин жана аскер комиссариатынын ардак грамоталары, ыраазычылык баракчалары салтанаттуу түрдө тапшырылды.
Ошондой эле мамлекет тарабынан Чернобыль апаатынын катышуучуларына ай сайын 10 миң сом өлчөмүндө социалдык компенсация төлөнүп, алар мамлекеттин камкордугуна алынган. Мындан тышкары, Каракол шаардык мэриясы тарабынан да туруктуу негизде бир жолку социалдык төлөмдөр көрсөтүлүп келет.