Turmush — Расмий эмес маалымат боюнча, Ош шаарында 800 миңге жакын адам жашайт. Бул тууралуу бүгүн, 21-апрелде Ош шаардык кеңешинин кезектеги сессиясында вице-мэр Масуда Айдарбекова билдирди.
Депутат Мирбек Маматов Ош шаарынын калкы канча экенин сурады.
Вице-мэр Масуда Айдарбекованын айтымында, статистика боюнча 489 миң адам бар. Бирок медициналык каттоодо андан көп. Расмий эмес маалымат боюнча, 800 миңге жакын адам жашайт.
Ошондой эле депутат 800 миң адамды тейлөө үчүн канча тез жардам борбору керек экенине кызыкты.
«Тез жардам борбору курула турган 3 подстанция бар. Эгер ошол жерлер оңдолуп, курулуп калса, мэрия да карап турбай жардам берет», - деди вице-мэр.