Turmush — Түп районунун Кудургу айылынын тургуну Жанат Кадыракунова 7 балалуу баатыр эне. Ал Turmush басылмасынын кабарчысы менен болгон маегинде үй-бүлөсү менен 2025-жылы тоок чарбасын түптөп, жергиликтүү тургундарды жумуртка менен камсыз кылып жатканын айтып берди.
«Баатыр эне» наамын алган Жанат Кадыракунова адегенде кыскача өмүр таржымалына токтолду.
«1985-жылы жарык дүйнөгө келгем, Ак-Суу районунун Качыбек айылында мектепти аяктадым. Көп өтпөй эле өмүрлүк жолдошум менен 2007-жылы баш кошуп, Кудургу айылында жашап келе жатабыз. Мен үйдөгү чарба менен алектенсем, жолдошум курулуш тармагында эмгектенет. Арадан жылдар өтүп, 6 уул, 1 кыздуу болуп, балдарыбызды тарбиялап келе жатабыз. Улуу баламан кийин кыз төрөдүм. Андан кийин кыз болот деп күтө берип катары менен уулдуу болдук. Азыр улуусу 17 жашка толду, кичүүсү 2,5 жашта. Өткөн жылы "Баатыр эне" наамына ээ болдум», - деди ал.
Каарманыбыздын айтымында, учурда жумуртканын бир даанасы 15 сомдон бааланып жатат.
«Көп балалуу үй-бүлө болгон соң 2025-жылга чейин мамлекеттен жөлөк пул алып келдик. 7 балага 7200 сом жөлөк пул алып, бир күндө дүкөнгө кирип, азык-түлүк алганда эле жок калат эле. Анан үй-бүлөбүз менен жумуртканы көп алып, тамак-ашка колдончубуз. Жолдошум менен кеңешип, "Социалдык келишим" мамлекеттик долбооруна катышып, 150 миң сом кайтарымсыз акча каражатын алдык.
Үйүбүдөгү эски тамды жасалгалап, жылуулап, жумуртка багытында 180 тоок, керектүү жабдуусу менен сатып алдык. Өткөн жылдан бери өзүбүздүн айылга жана жакынкы коңшу айылга жарнамалап, дароо эле кардарларды таап алдык. Бул баштаган ишибиз жигердүү болуп, айына 15-18 миң сомго чейин таза киреше таап келе жатабыз», - деди ал.
Жанат Кадыракунова жумуртка багытындагы тооктор аба ырайынын шартынан көз каранды экенин кошумчалады.
«Жумуртка багытындагы несушки тооктор өтө ысык же өтө суук болгон мезгилде туубай калат экен. Ошондой эле бул түркүмдөгү тооктор стресс алса да жумуртка бербей калганын байкадым. Себеби былтыр бизде негизги жол жасалып, кадимки добуштан чоочуп, стресске кабылышты. Келечекте тоок чарбаны кеңейтип, кыргыз тоокторун багууна да колго алсак деген максаттабыз. Ошондой эле жөжө чыгарган инкубатор иштетүүнүн жолун таап, жөжө чыгарып, киреше тапсакпы деген ойлорубуз бар», - деп сөзүн жыйынтыктады.
Социалдык келишим — бул Кыргызстандагы аз камсыз болгон үй-бүлөлөргө жашоо шартын жакшыртуу жана жеке бизнесин баштоо үчүн берилүүчү мамлекеттик кайтарымсыз жардам программасы.
Буга чейин каржылоонун суммасы 100 000 сом. 2025-жылдан баштап 150 000 сомго чейин көбөйтүлгөн. Негизинен «Үй-бүлөгө көмөк» жөлөк пулун алган, бизнес-идеясы бар жана аны ишке ашырууга даяр үй-бүлөлөргө берилет.